ខេត្តសៀមរាប៖ លោក សូរ ប្លាតុង អភិបាលនៃគណៈអភិបាលស្រុកប្រាសាទបាគង បានជួបសាកសួរសុខទុក្ខ និងផ្តល់អំណោយជាគ្រឿងឧបភោគបរិភោគ ជូនដល់គ្រួសារបងប្អូនពលរដ្ឋ ដែលរងគ្រោះដោយសារទឹកជំនន់កាលពីពេលកន្លងមក មានចាស់ជរា ស្ត្រីម៉េម៉ាយ និងគ្រួសារពលរដ្ឋដែលមានបញ្ហាខ្វះខាតជីវភាពចំនួន ៧០គ្រួសារ មកពីឃុំទាំង ៩ នៃស្រុកប្រាសាទបាគងនាព្រឹកថ្ងៃទី១៣ ខែមករាឆ្នាំ២០២១នេះនៅបរិវេណសាលាស្រុកប្រាសាទបាគង។
ទន្ទឹមនិងនេះផងដែរគ្រឿងឧបភោគបរិភោគនិងថវិការដែលនាំមកចែកជូននាពេលនេះ គឺជាកញ្ចប់ថវិការមូលនិធិរបស់រដ្ឋបាលស្រុកប្រាសាទបាគងក្នុងគម្រោងឆ្លើយតប ក្នុងគ្រោះមហន្តរាយឆ្នាំ២០២០ ដោយក្នុង១ គ្រួសារទទួលបានអង្ករ៥០ គីឡូក្រាម មុង១និងថវិកា៣០០០០រៀល។
ក្នុងឱកាសនោះដែលលោក សូរ ប្លាតុង អភិបាលស្រុកប្រាសាទបាគង បានក្រើនរំលឹកដល់បងប្អូនប្រជាពលរដ្ឋ ដែលជាអាណាព្យាបាល មានកូនគ្រប់អាយុត្រូវចូលរៀនត្រូវនាំកូនទៅចុះឈ្មោះចូលរៀនព្រោះសាលាបានបើក
ដំណើរការវិញហើយ។
សម្រាប់ការរស់នៅក្នុងជីវភាពប្រចាំថ្ងៃបងប្អូនត្រូវបង្កើនការអនុវត្តន៍វិធានការរបស់ក្រសួងសុខាភិបាល ដើម្បីបង្ការខ្លួនពីមេរោគកូវីដ១៩ ។ ជាមួយគ្នានេះ ដោយសារបច្ចុប្បន្ន អាកាសធាតុបានធ្លាក់ត្រជាក់ លោក អភិបាល ក៏បានក្រើនរំលឹក ដល់បងប្អូន ប្រជាពលរដ្ឋផងដែល អោយបង្កើនការប្រុងប្រយត្ន័ ថែរក្សាសុខភាពអោយបានល្អ ជាពិសេស
សម្រាប់មនុស្សចាស់និងក្មេងតូចៗ ត្រូវពាក់អាវក្រាស់ៗ ដោយឡែកសម្រាប់ការបង្កាត់ភ្នក់ភ្លើងដើម្បីអាំងក៏ត្រូវមានការប្រុងប្រយត្ន័ បង្ការកុំអោយ វាក្លាយជាករណីអគ្គីភ័យឆេះ បំផ្លិចបំផ្លាញទ្រព្យសម្បត្តិ និងផ្ទះសម្បែងរបស់បងប្អូនយើងផងដែរ ៕
